Nabigatzailea ireki dudanean Gmail notifier ez zebilela konturatu naiz eta Gmail-era gune nagusitik sartzea okurritu zait. Goian eskuinaldean agertzen den ohiko Loading… gorria beste leku batean ikusita aldaketa usaina hartu diot honi. Pantaila kargatu da eta hara, erabiltzaile-interfazeak aldaketak izan dituela begibistakoa da.
Goitibeherako menuak estilo pertsonalizatuan daude orain eta txata derrigorrez bistaratzen da. Mezu baten gainean sagua jartzean agertzen diren tooltip-ak ere ezberdinak dira, informazio gehiagorekin. Orain gainera, nabigatzailearen Atzera botoia badabil, Ajax aplikazioetan hainbeste kritikatzen den albo-ondorio honi aurre eginez. Bestalde, mezuak azkarrago kargatzen direla dirudi, bat-batean. Hala eta guztiz ere, moteltasun inpresioa eman dit eta nirea bezalako makina zaharretan makal ibiliko den irudipena daukat. Eta hori ez zait gustatzen, pisuzko arrazoi nahikoa iruditzen zait bertsio zaharra erabiltzen jarraitzeko —Older version sakatuta—. Gainera, oraindik ez dute aspalditik zain gauden ezaugarri sinple hori gehitu: euskarazko itzulpena.
Egia da pasa den astean postarako IMAP gaitu zutela eta orokorrean zerbitzu ona ematen duela Gmail-ek, baina aipatutako txikikeriengatik egunetik egunera gehiago desmotibatzen nau. Aldaketarako ordua iritsi da?

Firefox 2.0rekin batera RSS jarioetara harpidetzeko hainbat hobekuntza etorri ziren. Horrela, jarioa duten webguneetara harpidetzeko nahikoa da helbide-barrako botoia sakatzea. Gero, —gure hobespenen arabera beti ere— Firefoxek galdetuko digu ea zein irakurgailu erabili nahi dugun jario horretara harpidetzeko. Hiru aukera-mota azaltzen zaizkigu:

• Laster-marka dinamikoak. Honekin jarioak laster-markak bailiran agertuko zaizkigu, Firefoxen erabiltzaile-interfazean integratuta.
• Kanpoko aplikazio bat. Mahaigaineko programa bat aukeratzeko leihoa azalduko zaigu harpidetza burutzeko.
• Sareko zerbitzu bat. Egungo joera informazioa webean izatea denez, sareko irakurgailu batean (Bloglinesen adibidez) harpidetza egiteko aukera zuzena eskaintzen zaigu.

Ordea, azken hau baldin bada gure aukera, apurtxo bat mugatuta senti gaitezke, harpidetzak egiteko aukera hiru jario-irakurgailutarako bakarrik ematen zaigulako: Bloglines, My Yahoo! eta Google Reader zehazki. Nik baina Alesti erabiltzen dut, euskaraz dagoelako eta sudurraren puntan jartzen zaidalako. Hobespenen leihoan gainera, ez daukagu hauek pertsonalizatzeko aukerarik. Orduan, balia al dezaket Firefoxen ezaugarri hau edo ez dago modurik?

about:config

Nahiz eta aukerak agerian ez egon, Firefoxen dena alda daiteke. Kasu hauetan about:config gure laguna da. Idatzi helbide-barran about:config interneteko helbide bat bailitzan eta zerrenda luze bat agertuko da. Zerrenda horretan uneko profilak dituen hobespen guztiak agertzen dira, bai nabigatzailearekiko nahiz gehigarriekiko ezarrita daudenak.
Iragazkia testu-kutxan contentHandlers idazten badugu, ikusiko dugu nola bertan aurrez aipatutako hiru irakurgailuak agertzen diren. Sarrera guztiek formatu bera dute, contentHandlers.types.i, non i zenbaki bat den. Zenbakirik handiena izango dugu gogoan; nire kasuan 5 da.
Segidan, irakurgailu berri bat gehituko dugu. Kontua sarrera berriak gehitzea izango da, eta horretarako eskuin-klika egin beharko dugu leihoaren barruan eta Berria > Katea menu-aukerara jo. Hiru urrats nahikoak izango dira eta urrats bakoitzeko sarrera bana sortuko dugu:

1. Hobespen-izena: browser.contentHandlers.types.6.title
   Balioa: Alesti
2. Hobespen-izena: browser.contentHandlers.types.6.type
   Balioa: application/vnd.mozilla.maybe.feed
3. Hobespen-izena: browser.contentHandlers.types.6.uri
   Balioa: http://www.alesti.org/?subscribe-feed=%s

Pantailan horrelako zerbait agertu beharko zaigu:

Kontuan izan aurrez zegoen zenbaki maximoari bat gehitu diogula eta horregatik erabili dugula 6 zenbakia hobespenen izenetan. Bestetik, harpidetza burutzeko URIan %s parametroa erabiliko da; hau jarioaren helbideagatik ordezkatuko da.
Adibide honetan irakurgailu berri bat gehitu dugu, nahiz eta aurrez zegoen baten gainen egin genitzakeen aldaketak. Sareko beste edozein irakurgailu gehitu nahi izanez gero, aldatu beharreko bakarra lehenengo eta hirugarren urratsetako balioak dira. Hau da, pantailan bistaratuko den izenburua eta harpidetzeko helbidea.
Behin aldaketa hauek eginda, Firefox berrabiarazi eta helbide-barrako botoian klik egitean gure irakurgailu gogokoenarekin harpidetzeko aukera izango dugu!

CLISPen —Common Lispen inplementazio libre bat— terminaleko programa bat exekutatzeko beharraren aurrean irtenbide bat bilatu behar izan dut, irakasleak LispWorksen bakarrik dabilen kodea eman baitigu. Gauzak horrela eta zenbait bilaketen ondoren eman dut soluzioarekin: ext paketea.
Pakete honetan gainera, bi aukera ditugu eskura: run-program eta run-shell-command. Lehenengoari programaren izena pasa behar zaio karaktere-kate batean eta ondoren programak jasoko dituen argumentuen zerrenda —list bat—. Bigarrenak aldiz zuzenean terminaleko komando bat exekutatuko bagenu bezala interpretatzen du emandako katea. Hortaz, bigarren aukeraren sinpletasunari egin diot men:

(ext:run-shell-command (format nil "dot -Tpng ~a -o ~a" dot png))

LOGOk 40 urte bete dituela jakin berri dut Slashdoten eta horrekin batera oroitzapen gozoak etorri dira dortoka forman: lehenengo informatika klasetan Windows 3.1pean Win-Logorekin egindako marrazkitxo haiek…

Baina horrekin batera jakin dut LOGOren atzetik Lisp programazio-lengoaia dagoela —hau aitontzar bat LOGOren aldean, ia 50 urte!—. Azken aste hauetan hasi berri naiz Lispekin lehenengo txapuzak egiten eta hara kasualitateak nolakoak diren, nik uste bainuen nire bizitzan gauza berria zela Lisp baina hamaika urte lehenago ere hortxe izan nuen muturren aurrean. av 30 gd 90 eta tankerako aginduekin hasi ginen programatzen, baina artean txikiegiak ginen horretaz konturatzeko.

Aurreko asteko aurrerapenaren ondoren dagoeneko argitaratu dugu Euskalbarren 3.0 bertsioa. Oraingo honetan ordea, Mozillaren gehigarrien gune ofizialean (AMO) jarri dugu. Gune publikoan eskuragarri egon aurretik baina, erabiltzaileen berrikuspen positiboak behar dira. Behin hori lortuta, Euskalbar gune publikoan egongo da denon eskura eta eguneraketa automatikoa martxan jarriko dugu.
Probagunea atzitzeko AMOn erregistratzea beharrezkoa da eta ezarpen pertsonaletan Probagunea ikusi? markatuta eduki behar da. Euskalbar ez dugu ohiko gunean zuzenean jaisteko moduan utzi AMOko onarpena azkartu nahian erabiltzaileen berrikuspenak jasotzeko. Sentitzen dugu nahas-mahas hau baina gertatu beharreko zerbait da harik eta euskararen agerikotasunean beste urrats bat eman nahi badugu.
Jaitsi Euskalbar 3.0
Eguneraketa: Dagoeneko Euskalbar onartu dute gune publikoan eta zuzenean jaitsi dezakezue. Eskerrik asko zuen iritzia eman duzuen guztioi!

Kontsolatik lan egitea etxean sentitzea bezala da. Horregatik, ohituraz edo beharrez kontsolatik lan egiten dugunok gustuko kontsola bat izaten dugu eta mania ezberdinak lan egiterako orduan.
Fitxen bidez nabigatzearen ohitura kontsolara ekarriz, tresna paregabea da GNU Screen. Egia da GNOME eta KDE mahaigain inguruneek fitxak dauzkaten terminalak dakartzatela per se, baina GUI mailan lan egiten dutenez lan-eremua murrizten digute. Izan ere, Screen terminal mailako leiho-kudeatzaile bat baita. Gainera, bestelako terminalak erabiltzen ditugunontzat —urxvt, aterm, xterm, …— aukera eroso eta aparta da.
(more…)