Parlamentuaren datu-basea kuxkuxeatzen nenbilela, a ze nolako perla aurkitu dudan:
Informatikako produktuen itzulpenaren kostua Euskal Autonomia Erkidegoko Administrazioak eta Microsoft enpresak adostu beharko badute ere, aurre-akordioetan hirurehun eta hamahiru milioi ehun mila (313.100.000,-) pezetako kostua orokorra aurreikusten da.
Kontuan izan diru-kopuru hori 1998. urteko pezetatan dagoela.
Hori laugarren puntuan. Zazpigarrenak ere ez du desperdiziorik:
Hitzarmena izenpetzen duten aldeek, beren erakundeetan, euskarazko produktuen erabilera sustatzeko konpromisoa hartzen dute. Hori horrela, eta bakoitzak egokitzat jotzen dituen neurriak kontuan, euskarazko sistema eragilea aurretik barneratuta daraman hardwarea eskuratzearen aldeko ekintzak bultzatuko dituzte.
Uste dut pixka bat ezjakina naizela: inon saltzen dute euskarazko Windowsa dakarren hardwarerik? Eusko Jaurlaritzak bere etxean euskarazko softwarea erabiltzen du?
Tira, laster gehiago, ziur…
Fitxategi potolo bat jaitsi nahi nuen konexioari kaña apur bat emateko eta orduan akordatu naiz linuxiso.org gunearekin. Idatzi dut ba helbidea, baina segundu erdira sorpresa! hori ez da nik beti ezagutu dudan gunea! Antza —Netcraft-en arabera beti ere, inork memoria freskoagorik baldin badu…—, aspaldi desagertu zen nik ezagutzen nuen hura: GNU/linux banaketa pilaren ISO irudi freskoak aurki zitezkeen bertan, zuzenean deskargatzeko prest.
Non ibili ote naiz denbora honetan guztian halakoaren falta ez sumatzeko? Dirudienez, beharrak aldatu egiten dira eta, horiekin batera, ohiturak. Aspaldi joan ziren potatoak jaisten genituen garaiak…
Ateratzear den Linux 2.6.24 kernelak nobedade asko eta garrantzitsuak izango ditu, esaterako hobekuntzak hainbat zalaparta eragin duen CFS schedulerrean edo tickless moduaren hedapena arkitektura gehiagotara.
Baina batez ere nabarmentzekoa da hainbat buruhauste ematen dituzten wireless gailuentzat kontrolatzaile berriak izango ditugula. Aspalditik nabil hauen garapena jarraitzen, bereziki prism chipseta dutenena. Aurretik bazuten euskarria kernelean prism54 kontrolatzailearekin, baina txartelak perretxikoak bezala saltzen hasi zirenean —APak egiteko gehienbat—, fabrikatzaileek kostuak merketzeko txarteletan softmac firmwarea erabiltzen hasi ziren, horrek zekarrenarekin: kontrolatzaile berrien beharra eta ohiko trabak espezifikazioen faltan. Asmatu ze txartel erosi nuen nik… (prism gt motakoa zelakoan!)
Hortaz, orain arte txartel horiek —eta beste asko!— martxan jartzeko modu bakarra NDISwrapper erabiltzea zen, Windowseko kontrolatzailearekin batera. Horrek gainera hainbat muga ezartzen zituen, adibidez txartelak ezin baitziren jarri monitor edo master moduetan edo datuen zenbait zifratze-modu ezin baitziren erabili. Hemendik aurrera ordea panoramak onera egingo du eta prism chipseta duten gailuentzat (softmac, PCI eta USB) p54 kontrolatzailea erabili ahal izango dugu. Ondorioz, eraginkortasun eta segurtasunean irabaziko dugu nabarmen. Gainera, sisteman kontrolatzaile jabedun bat gutxiago izango dugu (gehiago ba al da?).
Adi beraz, kernel berria laster izango da eta horrekin buruhauste askoren amaiera etor daitekeelako!
Kontrolatzaile berri guztien zerrenda Kernel Newbies-en prestatu duten orrian aurki dezakezue.