Galderaren erantzuna inoiz baino gertuago egon daiteke, oraingoan Google, Yahoo!, IBM, Microsoft eta Verisign bezalako enpresa handiak izan direlako OpenID fundazioari babesa ematea erabaki dutenak. Aurretik izan dira urrats esanguratsu bezain garrantzitsuak, batez ere Google eta Yahoo!-ren aldetik. Gaurko urratsa haratago doa baina, behin betiko haize-ufada izan daitekeelako norantza horretan arraunean dabiltzanentzat. Hori gutxi balitz, zurrumurruek pentsaraz diezagukete Google izan daitekeela OpenID hornitzaileetan hurrena eta horren eraginez, OpenID estandarra izateko urrats handi bat emana legoke.
Pixkanaka-pixkanaka OpenID bidezko egiaztatzea hedatzen doa eta bide horretan bultzada nabarmena Yahoo!-k emango du, izan ere, aste hontan bertan jakin dugunez, edonoren eskura utziko baitu OpenID zerbitzua urtarrilaren 30etik aurrera, beta publiko gisa. Horrela, Yahoo! ID bakoitza OpenID euskarria duten guneetan erabili ahal izango da saioa hasi edo informazio pertsonala partekatzeko.
Aurretik aipatu genuen Bloggerreko iruzkinetan OpenIDren euskarria gaitu zela. Gainera, zurrumurruek Yahoo!-ren norantza berean jartzen dute Google, hau da, baliteke hemendik gutxira Googlen kontu bakoitza OpenID bezala erabiltzeko aukera izatea.
Hala irakurri dut dirson blogean, laster erabili ahal izango dela OpenID bidezko egiaztatzea Bloggerren iruzkinak idaztean. Ezaugarri berri honen irudi batzuk ikus daitezke Blogger in Draft blogean.
Bultzada serioa izan daiteke egiaztatze-sistema honentzat. Ikusiko dugu denborarekin.
OpenSocial aurkeztu berriak sortu duen zalaparta ikusita, horren atzean zer ezkutatzen den jakin nahi izan dut. Gari Araolazak Faktoria irratsaioan azaldu du gainetik zer den OpenSocial baina berak egindako baieztapen batzuekin ez nago erabat ados.
OpenSocial API bat da garatzaileek aplikazio sozialak garatzeko, bai bezero nahiz zerbitzari atalean. API honen bitartez sare sozial batean beste sare sozialetako informazioa ekarri ahal izango da, widget forman. Hau da, sare sozialak sare sozialen barruan integratzen dira, sare horren mugak gaindituz.
Baina OpenSocial ez da egiaztatze-sistema bat —beste batzuk ere nahastu dira honekin—, ez da single sign-on. Hortaz saioa leku batean hasteak ez dakar gainontzeko tokietan saioa hasita izatea. Gure informazioa sare sozial batean egongo da —adibidez myspacen— eta gune hori OpenSocial inplementatuta daukaten gainontzeko sareekin komunikatzeko gai izango da gure informazioa elkartrukatzeko. OpenSocialek loturak egiten ditu eta ondorioz informazio gehiago daukagu eskura.
Bestetik, informazioa ez da Googlen eskutan erortzen. Gure datuak sare sozial jakin batek izango ditu, bertan izen emanda gauden heinean eta beraz ez du Googlen kontuekin zerikusirik. Googlek hainbat sareen arteko adostasuna lortu du API amankomun bat inplementatzeko, industriako estandar bat izango dena. Horrela, garatzaileei buruhauste bat baino gehiago kenduko dizkie gainetik, ez baitute sare sozial bakoitzeko aplikazio berri bat garatu beharko; bakarrarekin nahikoa da.
Zalantzak uxatu eta adibide errealak ikusteko, Google berak egindako aurkezpen-sorta baten bideoa oso lagungarri izango zaizue. Era berean, OpenSocialei buruz egin ditzakegun oinarrizko galderak argitzea ezinbestekoa da. Azkenik, blog sarrera honek teknologia sozial ezberdinen sailkapena ulertzen lagunduko digu.
Aste honetan bertan Googlen Gmail posta zerbitzuak izandako aldaketen ondorioz Firefoxeko Gmail notifier hedapena ez dabil. Hedapenak gune zaharra espero duen tokian gune berria aurkitzen duenez komunikazioa ez du ongi burutzen.
Arazo honi aurre egiteko, AMOko eztabaidagunean adierazi bezala, aldaketa txiki batzuk egin beharko ditugu hedapenaren nsGMNotifierService.js fitxategian. Fitxategi hau zuen uneko profilaren karpetaren /extensions/{44d0a1b4-9c90-4f86-ac92-8680b5d6549e}/components/ azpikarpetan dago. Bertan:
?search=query&q=is%3Aunread&view=tl&start=0&init=1&
agerpenen bukaeran &ui=1 gehitu beharko dugu, mezu berrien bilaketa interfaze zaharrean egin dezan. Hau da,
?search=query&q=is%3Aunread&view=tl&start=0&init=1&ui=1
bezala utzi beharko dira agerpen horiek.
Firefox berrabiarazi eta lehen bezala txintxo-txintxo jakinaraziko digu mezu berriak daudenean.
Nabigatzailea ireki dudanean Gmail notifier ez zebilela konturatu naiz eta Gmail-era gune nagusitik sartzea okurritu zait. Goian eskuinaldean agertzen den ohiko Loading… gorria beste leku batean ikusita aldaketa usaina hartu diot honi. Pantaila kargatu da eta hara, erabiltzaile-interfazeak aldaketak izan dituela begibistakoa da.
Goitibeherako menuak estilo pertsonalizatuan daude orain eta txata derrigorrez bistaratzen da. Mezu baten gainean sagua jartzean agertzen diren tooltip-ak ere ezberdinak dira, informazio gehiagorekin. Orain gainera, nabigatzailearen Atzera botoia badabil, Ajax aplikazioetan hainbeste kritikatzen den albo-ondorio honi aurre eginez. Bestalde, mezuak azkarrago kargatzen direla dirudi, bat-batean. Hala eta guztiz ere, moteltasun inpresioa eman dit eta nirea bezalako makina zaharretan makal ibiliko den irudipena daukat. Eta hori ez zait gustatzen, pisuzko arrazoi nahikoa iruditzen zait bertsio zaharra erabiltzen jarraitzeko —Older version sakatuta—. Gainera, oraindik ez dute aspalditik zain gauden ezaugarri sinple hori gehitu: euskarazko itzulpena.
Egia da pasa den astean postarako IMAP gaitu zutela eta orokorrean zerbitzu ona ematen duela Gmail-ek, baina aipatutako txikikeriengatik egunetik egunera gehiago desmotibatzen nau. Aldaketarako ordua iritsi da?